Plantun de Prouvènço

Pèr coumpara dos planto d'encò nostre

Malva sylvestris & Osmunda regalis

Mauvo

Malva sylvestris

Malvaceae

Àutri noum : Maulo, Mavo, Maugo, Mauvo-vèrdo.

Noms en français : Grande mauve, Mauve des bois.

Descripcioun :
Proun grando planto di bèlli flour viouleto venado que s'atrobo eisa pèr camin, dins lis terro faturado e lis escoumbre. Lou fru a mino d'un froumajoun.

Usanço :
Li flour e li fueio de mauvo en tisano soun proun vertuouso contro li mau de garganto, la brounchito, lou toussi, la rauquiero, lou mau de dènt, li bresego (mau-blanc) e li panàri (en coumpresso).

Port : Grando erbo
Taio : 30 à 150 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Malva
Famiho : Malvaceae

Coulour de la flour : Vióuleto
Petalo : 5
Ø (o loungour) flour : 3,5 à 4,5 cm
Flourido : Printèms - Estiéu - Autouno

Sòu : Ca
Autour basso e auto : Pancaro entresigna
Aparado : Noun

Liò : Champ - Escoumbre e proche dis oustau - Camin
Estànci : Termoumediterran à Mountagnard
Couroulougi : Eurimediterranenco
Ref. sc. : Malva sylvestris L., 1753

Erbo-dóu-matelot

Osmunda regalis

Osmundaceae

Noms en français : Fougère royale, Osmonde royale.

Descripcioun :
L'erbo-dóu-matelot trachis dins li relarg séusous de Prouvènço. Es un grand féuse que pòu faire fin qu'à dous mètre d'aut. Li foundo soun longo e d'un vert clar. D'ùni porton en bout li soro, e alor soun soun mai torso e sarrado.

Usanço :
Pèr F. Mistral, bessai sarié estado utilisado, emé l'erbo-de-la-routo, contro lou mau-de-terro (escourbut-TDF). Emé la racino se fasié uno poumado contro li macaduro. Tambèn la racino ajudo à pissa, es astringènto e purgativo.